Папата Франциск со порака до производителите на оружје: „Запрете!“
Папата Франциск при денешната посета на воените гробишта во Рим, на денот кога католиците се сеќаваат на своите мртви, ги повика производителите на оружје да „запрат” бидејќи војната „ги голта децата на татковината”, пренесува Ројтерс.
На денот на сите души, папата Франциск служеше миса на француските воени гробишта во Рим, местото на погребување на околу 1.900 француски и марокански војници убиени во Втората светска војна.
Франциск, кој секоја година на овој ден ги посетува гробиштата, положи бели рози и застана на некои од гробовите да се помоли и спомна дека на еден од нив пишува „Непознат, умре за Франција, 1944 година”.
„Дури нема ни име. Но во срцето на Бог сите се наши имиња. Ова е трагедијата на војната“ рече тој во импровизирана проповед.
„Но… дали се бориме доволно силно да нема војни, да нема економии на земјите кои зајакнуваат благодарение на индустријата за оружје?”, додаде тој.
„Овие гробници се порака за мир. Застанете браќа и сестри, застанете. Застанете производители на оружје, застанете! рече тој, додавајќи дека на овие гробишта се погребани луѓе кои се меѓу многуте „жртви на војната, кои ги голтаат децата на татковината”.
Франциск досега има упатено многу повици за разоружување и изјави дека нуклеарното оружје треба да се забрани бидејќи дури и нивното поседување заради одвраќање е „перверзно” и неодбранливо.