Најголемиот дел од штипските конфекции што се затворени поради ковид-19 се обезбедени со нарачки, па затоа нивните сопственици се подготвени на своите вработени да им го платат тестирањето, за да се види колку од нив се здрави и може да продолжат со работа, вели Ангел Димитров, претседател на Организацијата на работодавачи (ОРМ). Се зависи од добиените резултати, а за намалување на ризикот, во некои конфекции ќе се користи двонеделен одмор. За да се спречи ширењето на вирусот, сите конфекции ќе постават ковид-19 координатори.

Според Димитров, генерално од почетокот на пандемијата немало откажувања на нарачките, но евидентно е нивното намалување. Германија е нашиот најголем текстилен партнер, а извозот главно се темели на лесна конфекција (женски блузи, машки кошули и панталони).

– И покрај тоа што некои од големите странски брендови прогласија банкрот во изминатиот период, за среќа нашите партнери сѐ уште се држат. Но, евидентно е дека се намалуваат нарачките. Она што загрижува е фактот дека пандемијата не влијаеше само врз индустријата туку и врз трговијата, па голем број продавници за текстил во светот не работеа во изминатите два месеца. И сега кога продавниците се отворија, стравот од можното заболување ги држи купувачите подалеку од нив. Само, како пример, во меѓувреме банкротираше и една голема трговска куќа во Германија, во чии дваесетина стоковни куќи се продаваа и македонски текстилни производи. А сега да се бараат нови партнери е многу тешко – објаснува Димитров.

Колку е сложено да се работи во вакви услови, според Димитров, може да се види и преку податокот дека не се остварија и надежите за зголемени нарачки на медицинска работна облека, бидејќи освен специјалните ковид-скафандери, другата облека не им е потребна на странските болници поради откажаните здравствени интервенции. Сето ова влијае и врз ликвидноста на оваа трудоинтензивна гранка, па затоа Димитров констатира дека најважно од сѐ ќе биде што побезболно да се извлечеме од овие состојби и што побрзо да ги надоместиме штетите, не само во текстилната туку воопшто и во целата индустрија.

Текстилната индустрија вработува околу 30.000 луѓе, што претставува приближно една третина од сите вработени во производствениот сектор. Индустријата е извозно ориентирана и реализира околу 400 милиони евра на годишно ниво. Повеќе од 90 отсто од извозот оди во Германија, Грција, Холандија, Велика Британија. Водечка извозна земја за македонската текстилната индустрија е Германија, на која отпаѓа и до 63 отсто од извозот.

Според регионалната поставеност, најголем дел текстилната индустрија е лоцирана во Источниот статистички регион. Најголема концентрација на текстилни компании има во Штип, каде што се регистрирани повеќе од 70 конфекции, потоа следува Кочани со повеќе од 50 компании и Делчево со над 30 конфекции.