Официјално двајца загинати во масовни поплави во Белгија, а пријавени се повеќе исчезнати лица
Цел ден и цела ноќ вчера непрекинатите дождови го поплавија југот на Белгија и посебно градот Лиеж и неговата околина, при што загинаа две лица.
Пријавени се повеќе исчезнати лица исто така, порачаа градските власти во Лиеж, по нив сѐ уште се трага. Една од жртвите е 22-годишно момче кое се обидело да се спаси од поплавите со гума за пливање, за другата жртва сѐ уште нема детали за нејзиниот идентите.
Ситуацијата е повеќе од критична, апелираат властите.
Целата железничка инфраструктура е прекината, возовите не циркулираат од вчера поради опасноста за безбедноста на целиот персонал, но и за да се пренасочат сите ресурси на спасување на луѓето заглавени во овие масовни поплави.
Во меѓувреме властите продолжуваат да ги евакуираат жителите од нивните домови, патиштата и автопатиштата се затворени.
Според метеоролошките прогнози дождовите ќе продолжат и денеска цел ден, реката Меза би можела да го преплави градот Лиеж, трговците и жителите се молат да ги испразнат своите подруми и да ги преземат сите превентивни мерки.
Се очекува дождовите да престанат дури в сабота.