Капацитетот на модуларната болница на Клиниката за инфективни болести и фебрилни состојби во Скопје не е променет, но бројот на хоспитализирани се намалува поради исписите на пациентите.

Модуларната болница на Инфективната клиника има капацитет од 70 легла, а зградата 100 легла. Во моментот во модуларната болница има хоспитализирано 43 пациенти, а во зградата на клиниката 100 пациенти, велат за „Слободен печат“ од Министерството за здравство.

Според последните статистики на Институтот за јавно здравје, вкупниот број на актинви случаи со ковид-19 е 13.027, а дистрибуцијата по градови е најголема во Скопје со 5.788 пациенти, Тетово 1.082 пациенти и Куманово 903 пациенти. Состојбата во Гостивар се стабилизира, активни се 614 случаи и најавено е дека тамошната модуларна болница ќе биде затворена зашто нема толку многу барања за хоспитализации.