Објавен е конкурс за поезија и за дизајнерски решенија за манифестацијата „100 илјади поети за промена“
Mанифестацијата „100 илјади поети за промена“, во соработка со здружението „Контекст – Струмица“, распиша конкурс за поезија и за плакат за 13. издание на поетската манифестација што се одржува во Струмица.
Поезијата со која конкурираат автори од сите генерации треба да биде социјално ангажирана и да разработува теми што се поврзани со промените, глобално, но и локално.
Секој автор ќе учествува со по една песна, а пристигнатите творби ќе бидат разгледани од комисијата којашто ја одредува организацискиот одбор на манифестацијата и здружението и потоа селектираните автори ќе бидат застапени во зборникот „100 илјади поети за промена“ – Македонија, кој ќе биде издаден како дел од оваа манифестација.
Конкурсот за дизајнерско решение на постери/плакати, кои ќе бидат дел од групна изложба во рамките на фестивалот, а тематски можат да бидат насочени кон глобалните промени, литературата, одржливиот развој и мирот, е отворен до 25 септември 2023 година, по што пристигнатите решенија ќе бидат разгледани од комисијата којашто ја одредуваат организацискиот одбор на манифестацијата и здружението.
Дизајнерските решенија може да се испраќаат на [email protected] или на Фејсбук-профилот на манифестацијата. Пристигнатите дела ќе бидат изложени за време на изложбата која е дел од манифестацијата „100 илјади поети за промена“ на 30 септември 2023 година во Струмица. Дизајнот на плакатот за манифестацијата е на Лазе Трипков.
(Текстот е објавен во „Културен печат“ број 197, во печатеното издание на весникот „Слободен печат“ на 23-24.9.2023)