Губењето на вишокот килограми станува потешко по 40-тата година поради хормонални промени и забавен метаболизам.

По 40-тата година, многу жени забележуваат дека губењето тежина станало потешко отколку порано. Хормоналните промени, бавниот метаболизам и различниот начин на живот го отежнуваат одржувањето на рамен стомак. Меѓутоа, според нутриционистите, една од главните причини често се крие токму во исхраната.

Одредени намирници можат да ги саботираат вашите напори да останете витки или успешно да ослабете; згора на тоа, некои од нив го поттикнуваат таложењето на маснотии околу половината. Затоа, диететичарите предупредуваат за неколку видови храна што треба да се ограничат или целосно да се отстранат од менито.

1. Замрзнати готови оброци

Иако се практични и често изгледаат како поздрава опција, експертите истакнуваат дека станува збор за високо преработена храна.

Нутриционистката и диететичарка Бријана Адлер Гелфанд наведува дека ваквите оброци можат да предизвикаат воспаленија, лошо варење и несакано таложење на маснотии, особено околу половината.

„Истражувањата покажаа дека исхраната богата со високо преработена храна е поврзана со поголем ризик од дебелина и хронични болести“, рекла таа за „Ши фајндс“ (SheFinds).

2. Бел компир

Компирот е вреден извор на витамини, минерали и антиоксиданти, но претераната консумација на бел компир може да биде проблематична.

Диететичарката Мелиса Митри објаснува дека компирот има многу висок гликемиски индекс: „Колку е повисок ГИ, толку побрзо се зголемува нивото на шеќер во крвта“, истакнува таа.

Честите нагли зголемувања на шеќер можат да поттикнат воспаленија и дебелеење, особено во пределот на стомакот. Митри додава и дека „белиот компир е најкалоричниот скробен зеленчук“, па затоа како подобра алтернатива го препорачува слаткиот компир – батат.

3. Рафинирани јаглехидрати

Примери се белите тестенини, белиот леб и белиот ориз. Адлер Гелфанд нагласува дека таквите производи „брзо се варат и предизвикуваат ненадејни скокови на шеќерот во крвта, после кои следуваат опаѓања на шеќерот, што го зголемува гладот ​​и поттикнува прејадување“.

Овие осцилации на шеќерот во крвта, заедно со слабото чувство на ситост, го олеснуваат внесувањето вишок калории – особено во пределот на стомакот. Наместо овие намирници, диететичарите препорачуваат интегрални житарки како што се киноа, кафеав ориз или леб од цело зрно на пченица.

4. Пржено пилешко

Прженото пилешко спаѓа во групата висококалорични пржени намирници што треба да се избегнуваат ако сакаме да ги намалиме масните наслаги на стомакот. Диететичарката и нутриционистка Мери Сабат забележува дека таквите производи често се „извор на транс-масти“ што може да доведе до голем број здравствени проблеми.

Редовното консумирање пржено пилешко може да предизвика таложење на маснотии на стомакот, зголемување на воспаленијата и да придонесе за дебелеење. Покрај високата калорична вредност, проблем е и недостигот на хранливи материи и влакна, што е рецепт за несакани последици.