Норвешката сликовница „Јарињата Брусе одат на училиште“ ја открива магијата на старите приказни
Уникатно илустрираната сликовница за деца „Јарињата Брусе одат на училиште“ од Бјорн Ф. Рорвик и Гри Моурсунд се потпира на една стара народна приказна за трите јариња, но магијата на Рорвик и Моурсунд се состои во тоа што тие ја преобликуваат бајката и ѝ даваат нов живот.
„Јарињата Брусе одат на училиште“ е дел од серија сликовници за јарињата Брусе, од кои издавачката куќа „Артконект“ досега ја има издадено и наградуваната „Јарињата Брусе одат на базен“. Преводот на двете книги од норвешки јазик е на Јасминка Марковска.
– Кога пишувам приказна за сликовница, главно го пишувам дијалогот и дејството и ништо за тоа како изгледаат карактерите или локацијата. Мора да остане доволно голем простор за илустраторката, зашто таа би сакала книгата да е исто толку нејзина колку што е и моја. Таа треба да смислува работи, мали приказни, мали детали што не се спомнуваат во текстот. Во книгата има многу ликови што не се спомнуваат во текстот и има мали приказни што таа ги измислила, што јас никогаш не сум ги кажал – објаснува авторот Рорвик.
Авторот Бјорн Ф. Рорвик работи во филмската индустрија и пишува книги за деца кои постигнуваат огромен успех и во Норвешка и низ целиот свет. Илустраторката Гри Моурсунд има добиено голем број награди за нејзините илустрации, меѓу кои и наградата „Браге“ во 2003 година, како и наградата за најдобра сликовница на норвешкото Министерство за култура во 2009 година за книгата „Јарињата Брусе одат на базен“.
Сликовницата „Јарињата Брусе одат на училиште“ е објавена во рамки на проектот „Соочување со неизвесноста: современа европска литература“, што издавачката куќа „Артконект“ го реализира со поддршка на програмата „Креативна Европа“ на ЕУ.
(Текстот е објавен во „Културен печат“ број 220, во печатеното издание на весникот „Слободен печат“ на 2-3.3.2024)