Министерот за земјоделство Љупчо Николовски е дециден дека нема да потпишува никаква согласност за отворање рудници или каква било пренамена на плодно земјиште од прва и од втора класа. Тој откри дека само за време на неговиот и на мандатот на неговиот претходник во МЗШВ, Трајан Ангеловски, не биле дадени вакви согласности, а потсети и дека негативно било неговото мислење за отворање на рудникот Казандол. Иднината на Македонија е во производството на храна и во туризмот, смета Николовски, и затоа не треба да се дозволува пренамена на обработливото земјоделско земјиште.

– Сега како што е поставена работата, никој не може да ја сопре пренамената на земјоделското земјиште, бидејќи законот тоа го дозволува, а општините се надлежни за издавање дозволи за пренамена. Сметаме дека во иднина треба законски да се забрани пренамената на првата и на втората класа плодно земјиште. Светот се бори за секоја педа обработливо земјиште, а така треба и ние да се однесуваме – посочи Николовски.

Според него, токму во ИПАРД 3 програмата е ставен фокус на мерката Агро-екологија, клима и органско производство наменета за еколошко и органско земјоделско производство и производство, кое ќе придонесе за заштита на животната средина и надминување на влијанието на климатските промени.