Кога зелената ламбичка ќе се вклучи на вашиот уред, повлечете со прстот од врвот надолу за да дознаете која апликација ја користи камерата и/или микрофонот.

Зеленото светло (ламбичка) во горниот десен агол на вашиот паметен телефон кој го покренува оперативниот систем Андроид ви кажува дека некоја апликација ги користи сензорите во мобилниот телефон – или микрофонот или камерата, пишува „Дејли мејл“.

Секако, ако споменатото светло е вклучено, а вие не сте покренале ниту една апликација која користи камера или микрофон, можно е некој злонамерен актер да ве шпионира преку некој вид шпионски софтвер.

Во повеќето случаи, не треба да обрнувате внимание на оваа ламбичка, меѓутоа, ако се сомневате дека некој ве шпионира, тогаш треба да бидете брзи и итри.

– Светлото ќе се вклучи ако ја користите камерата, ако телефонирате или ако користите апликација којашто не може да работи без нив, на пример, гласовен или дигитален асистент. Главно се работи за апликациите на кои сте им дозволиле да ги користат камерата и микрофонот – вели Џејми Ахтар, главен извршен директор и ко-основач на компанијата за компјутерска безбедност „СајберСмарт“ (CyberSmart).

– Меѓутоа, ако во горниот десен агол забележите портокалово или зелено светло кога не користите ниту една апликација, време е тоа да го истражите – додава Ахтар.

– Најчесто се работи за тоа дека сте дозволиле на некоја апликација да пристапи до камерата или микрофонот кога не работи. Прегледајте на кои апликации сте им дозволиле да ги користат камерата и микрофонот и оневозможете ги апликациите што немаат пристап до нив да ги користат. Ако и тоа не помогне, можно е телефонот да ви е хакиран и да ве следат – тврди Ахтар.

Директорот на „СајберСмарт“ им препорачува на корисниците што се сомневаат, да ги скенираат своите мобилни телефони за да видат дали на нив некако е уфрлен некој злонамерен и штетен софтвер. Потоа, корисниците треба да ги променат своите лозинки, но не на сомнителниот апарат, туку на некој уред за кој знаат дека е безбеден. Конечно, мобилниот телефон потоа треба да се врати на фабричките поставки.

Кога зеленото светло ќе се вклучи на вашиот уред, повлечете со прстот од врвот надолу за да го отворите горното мени во кое пишува која апликација ја користи камерата и/или микрофонот. Ако тогаш со прстот ја притиснете зелената ламбичка, мобилниот телефон ќе ви каже која апликација ја користи камерата и/или микрофонот. Ако сметате дека таа апликација нема за што да ги користи овие два уреди, одземете ѝ ја дозволата во поставките.