Панајотис Стафилос ја преживеал денешната страотна железничка несреќа во Грција во која загинаа преку 40 луѓе. Неверојатна среќа му го спасила животот. Тој имал билет за второто купе, но направил мала грешка – ги измешал бројките, пренесува српски „Данас“.

Првиот и вториот вагон на возот се речиси целосно уништени во судирот со товарниот воз, изјави регионалниот гувернер. Да седел каде што требало, Стафилос сега веројатно ќе беше мртов. Петтиот вагон, во кој случајно се нашол младиот човек, не ни излетал од шините.

Во интервју за „Би-би-си“, тој вели дека поради „можеби чиста среќа, или Господ“, тој не е меѓу повредените или загинатите во несреќата. Стафилос вели дека луѓето во неговиот вагон биле вознемирени и во паника по инцидентот и тој се обидел да им помогне и да ги смири.

„Прво ги скршивме прозорците, но немавме соодветни алатки за да го направиме тоа… па се обидовме да ја скршиме вратата“.

На крајот пристигнала помош.

Стафилос вели дека пред судирот возот застанал околу 15 минути на станицата Лариса, но тогаш не размислувал дека нешто не е во ред, бидејќи доцнењето во железничкиот сообраќај е нормално во Грција.