Обвинителката Вилма Русковска вели дека нема намера да му се извинува на обвинетиот поранешен генерален секретар на Владата, Драги Рашковски, по вчерашното интервју во кое таа рече дека трпела закани и притисоци да се откаже од обвинението против Рашковски.

Во изјава за „Макфакс“, Русковска вели дека со ништо во интервјуто не го навредила, откако претходно Рашковски, кој е обвинет во случајот „Софтвери“, преку соопштение побара обвинителката да му се извини бидејќи јавно посочи оти имала непристојни понуди да биде назначена на функција додека предметот против него бил во истрага.

„Немам зошто да се извинам. Го навредив со нешто? Ниту го навредувам со нешто, ниту мислам да се извинувам, а воопшто не сакам да ги коментирам неговите изјави“, вели Русковска.

Рашковски посочи дека ако не добие извинување, ќе поднесе тужба за клевета против обвинителката.

„Согласно, Закон за граѓанска одговорност за навреда и клевета член 13 упатувам до Вас барањe за извинување и јавно повлекување на искажаното, кое доколку не следува, против Вас ќе биде поднесена соодветна тужба за клевета и навреда. Согласно член 9 од истиот закон “Тужениот е должен да ја докажува вистинитоста на фактите содржани во тврдењето”. Извинувањето барам да биде направено на истиот начин како што ја имате дадено и изјавата дека некој Ви правел притисок за овој предмет“, напиша Рашковски во соопштението.

Поранешниот владин генерален секретар постојано тврди дека не е виновен за злоупотребите со софтвер кои му се ставаат на товар и се обидува да ја убеди јавноста во тоа, испраќајќи соопштенија и колумни во медиумите.

Русковска вели дека трпела притисоци и закани да се откаже од обвинението против Рашковски