Нема веќе секој да може да прави бесплатен тест за антитела
Отсега нема да може секој да направи бесплатен тест за присуство на антитела на ковид-19 на Институтот за имунобиологија и хумана генетика во Скопје.
Министерот за здравство Венко Филипче денеска објави дека ќе се воведат категории и ограничувања за тоа кој се ќе може да ги направи овие тестирања, бидејќи како што рече, претставувале трошок за државата.
– Ќе има бесплатно испитување за присуство на антитела, но ќе има категории за да не го прави секој тој тест. На пример, ќе може да се тестира лице кое прележало ковид-19, или потребно е испитувањето пред да се прими вакцина, изјави денеска министерот за здравство Венко Филипче.
На оваа тема утрово министерот рагзоварал со директорите на Фондот и на Институтот, и се согласиле дека треба да продолжи праксата овие тестови да бидат на товар на државата, покриени од државен трошок, но ќе мора да се редуцираат пациентите кои ќе ги прават.