Намалените цени на пијалаците водат кон загуби
Групацијата производители на алкохолни и безалкохолни пијалаци при Здружението за земјоделство и прехранбена индустрија при СКСМ писмено му се обрати на министерот за економија, наведувајќи аргументи со кои се укажува и докажува штетноста на замрзнувањето на цените. Како што велат, десетпроцентното намалување за производителите и за трговците ќе значи работење со загуба, при што компаниите ќе немаат каква било можност за развој, нови инвестиции и вработувања.
Според нив, растот на цените во изминатиот период е објективен, односно не се работи за самоволие, туку се ѝ се припишува на кризата, под чие влијание се поскапени суровините и репроматеријалите. Имено, цената на стаклената амбалажа се зголеми за повеќе од 100 отсто, ПЕТ-амбалажата за 30 проценти, исто толку и амбалажата и капачињата, двојно е зголемена цената на шеќерот, главната суровина за производство на пиво е зголемена за 110, а за повеќе од 30 проценти се повисоки цените на свежото овошје.
Исто така, за цената на пивото бараат државата да преземе дел од трошоците преку намалување на акцизата, која кај нас е до трипати поголема од оние што се применуваат во земјите од регионот и во ЕУ. Како што се наведува, во Македонија акцизата за пиво со пет степени алкохол е 32,5 евра за хектолитар, додека во Романија е 8,63, Бугарија 9,2, Германија 9,44, Чешка 14,69, Австрија 24 и во Хрватска – 25,89 евра за хектолитар.
Претходно, реагираа и производителите на овошје и зеленчук, кои исто така тврдат дека цените на домашните производи мора да се зголемуваат токму поради репроматеријалите, но и поради намаленото производство.