Во Аеродром денеска беше поставен камен темелник на Полициска станица кој ќе се гради на површина од 3.500 метри квардатни. Предвидениот рок за изградба на објектот е 30 месеци од денот на воведување во работа на економските оператори изведувач и надзор, со вкупна вредност од околу 130.000.000 денари, предвидени од Буџетот на Република Северна Македонија.

На настанот денеска присуствуваа премиерот Димитар Ковачевски заедно со министерот за внатрешни работи, Оливер Спасовски, министерот за транспорт и врски, Благој Бочварски, директорот на Бирото за јавна безбедност Сашо Тасевски, заменик директорот на Бирото за јавна безбедност, Арбен Јашари.

Денеска овде поставуваме камен темелник на нов објект на Полициската станица Аеродром, која ќе биде една од најголемите во градот и ќе покрива подрачје со најголем број жители во метрополата. Проектот на новата полициска станица која овде ја градиме од темел е проектиран да се изведе на површина од 3.500 квадратни метри, каде ќе поставиме нов модерен објект што содејствува на предизвиците, меѓутоа и на потребите на граѓаните во Аеродром – изјави Ковачевски.

Министерот за внатрешни работи, Спасовски во своето обраќање истакна дека ова е трет објект во низата нови градби на МВР. Тој изрази и задоволство што преку овој објект продолжуваат со концептот „Сината униформа дејствува за зелена околина“.

Со тоа даваме свој придонес кон остварување на Владината политика за енергетска ефикасност, преку мерки и активности за ефикасно користење на енергијата, вршење на услуги за енергетска ефикасност, како и преку исполнување на обврските на јавниот сектор во поглед на енергетската ефикасност и заштедата на енергија – додаде министерот.