На Мета му дојде преку глава и вели „доста е со корупција“: Албанија е прва во Европа, а четврта во светот по баратели на азил
Албанскиот претседател Илир Мета објави фотографија на Фејсбук на која неговата земја е рангирана како лидер во Европа и четврта во светот по поднесени барања за азил за периодот 2010-2019 година.
Мета наведува дека неговата земја не заслужува да биде рангирана меѓу Сирија, Авганистан, Ирак и Иран и апелира да не се оди во погрешна насока. Како прв чекор за враќање во вистинската насока, албанскиот премиер бара да се почитува точка по точка од договорот од 5 јуни за изборните реформи и изборните листи да бидат 100 отсто отворени.
– Доста е! Албанија не заслужува да биде рангирана меѓу овие земји. Албанија заслужува само европска иднина. Доста е со погрешен правец на авторитаризам, ароганција, корупција и глупост, што толку многу ги осиромашува и изморува Албанците и ги принудува да ја напуштат земјата. Да ја вратиме надежта со враќање на суверенитетот во рацете на народот, со 100 отсто отворени изборни листи и исполнување на сите услови на ЕУ, порача Мета преку објава на Фејсбук.