Меѓународниот монетарен фонд ги подобри очекувањата за растот на македонската економија со есенските проекции. Во Светскиот економски преглед, кој го објави Фондот, растот на домашната економија за 2023 година е проектиран на 2,5% или за 1,1 процентен поен повисоко во однос на проекциите на ММФ од април годинава.

Во однос на стапката на инфлација, ММФ очекува истата да продолжи да се намалува годинава и следната година, додека во 2025 година истата би се вратила на историски ниските вредности од околу 2% и би се задржала на тоа ниво следните години.

Проекцијата на ММФ за раст на македонската економија е блиска до проекцијата при подготовката на Нацрт-Буџетот за 2023 година.

Очекувањата за растот во регионот во најголем дел се блиску до очекувањата за домашната економија (Бугарија 1,7%, БиХ, Србија и Словенија 2%, Грција 2,5% и Хрватска 2,7%), додека малку повисок раст се очекува во Албанија, Косово и Црна Гора (3,6%, 3,8% и 4,5%, респективно). На среден рок ММФ очекува забрзување на растот на домашната економија на стапки од 3,5%, намалување на долгот на општата Влада и стапката на невработеност – соопштуваат од Министерството за финансии.