Жестоко ќе биде на седницата на Централното претседателство на ДУИ, закажана за 29 октомври, зашто освен отчетот на министрите што го побараа „огнените“, и другата страна ќе бара бунтовниците да прикажат што сработиле како потпретседатели на партијата, како пратеници и како градоначалници. Високи функционери на ДУИ брифираат за „Слободен печат“ дека и „огнените“ ќе бидат повикани да дадат отчет за да има увид претседателството кој колку тежи во партијата и во институциите и дека од тоа ќе зависи кои функционери ќе останат, а кои ќе треба да се повлечат од функциите.

Состанокот се очекува да трае неколку денови, зашто според нашите сознанија, првиот вицепремиер и министер за политички систем Артан Груби, кој е главна мета на „огнените“, но и другите министри од редовите на ДУИ Крешник Бректеши, Бујар Османи и Фатмир Бесими, подготвуваат отчет за сработеното на десетици страници.

– Ќе бараме отчет од пратениците кој колку сработил, колку присуствувале на комисиите и на пленарните седници, дали гласале против проекти на ДУИ. За сработеното ќе треба да реферираат и градоначалниците – дали и колку проекти реализирале. Отчет ќе бараме и од поранешните потпретседатели на партијата Изет Меџити, Садула Дураку, Невзат Бејта и Теута Арифи, но и од други функционери да кажат дали работеле против партијата – вели висок функционер на ДУИ.

Дознаваме дека функционерите што се на удар од „огнените“ на состанокот ќе бараат двоен отчет од Меџити, кој ќе треба да реферира и за сработеното како пратеник и како потпретседател на партијата. Тие тврдат дека Меџити не се појавил на ниту една седница на собраниска комисија и дека ретко присуствува и на пленарните седници, а и дека гласал против ДУИ и говорел против Груби.

Од градоначалниците на тапет, како дел од „огнените“, ќе бидат сарајскиот и чаирскиот градоначалник Блерим Беџети и Висар Ганиу. Поранешните потпретседатели Бејта и Арифи ќе треба да објаснат зошто ги изгубиле изборите во Гостивар и во Тетово, а од Меџити и од Дураку ќе бараат да кажат колку и какви кампањи организирале и што направиле за партијата.

Според нашиот извор, расте револтот против „огнените“ во партијата, бидејќи продолжиле и ги интензивирале обвинувањата во јавноста против министрите, иако едно од главните барања им било враќање на дебатата во партијата откако ќе се формираат партиските тела.

– Се формираа партиските органи, но „огнените“ секојдневно водат медиумска кампања против министрите и предизвикуваат гнев во партијата. Немаат поддршка ни кај мнозинството ни во Централното претседателство, ни во Генералниот совет. Зборуваат за отчет на министрите, а додека беа на функции никогаш не приложиле за сработеното. Од вицепремиерите за Рамковен договор, само поранешниот Хазби Лика и сегашниот прв вицепремиер Артан Груби дале отчет во партијата. Отчет никогаш не дале ни Муса Џафери, ни покојниот Абдулаким Адеми – вели еден од функционерите на ДУИ, кои се на тапет на т.н. „огнена група“.