Екипата на Вардар во 2019 година по втор пат триумфира во Лигата на шампионите, а еден од најзаслужните за големиот успех е голманот Дејан Милосављев, кој во интервју за српски „Журнал“ зборуваше за настапот на фајнал-фор турнирот во Келн како и за дочекот кој ракометарите го имаа во Скопје.

Милосављев со 18 одбрани блескаше во полуфиналето против Барселона кога „црвено-црните“ славеа со пресврт, додека во финалето го победија Веспрем со 27:24.

– Во тие три дена од фајналфорот едвај спиев, можеби и еден час дневно, а не ни јадев. Обично сум опуштен, не сум нервозен, мирен сум, но тогаш во Келн ги менував маичките на секои половина час бидејќи се потев. Чувствував одговорност бидејќи тимот ми веруваше и сакав да дадам се што можам во тој момент. Како некој да ме исфрли на покривот на Ланксес Арената кога ја освоивме титулата. Не знаев каде да одам, дали да одам во соблекувална или да се јавам на моите или да одам кај жена ми. Не знаев што да правам со себе – вели Милосављев.

Актуелниот голман на Берлин и на српската репрезентација, го памети и спектакуларниот дочек кој го имаа ракометарите по освојувањето на шампионската титула.

– Мислам дека тоа не го доживуваат ниту најголемите фудбалски или НБА екипи. Совршенство. Капата долу за оние луѓе кои навиваа за нас и нè пречекуваа. Македонија живее за ракометот, за Вардар. Ме третираа како ѕвезда, кога поминував на улица ме гушкаа и ми бакнуваа раце. Мајка ми секогаш кога ќе видеше нешто такво, плачеше од радост. Не ѝ се веруваше што ми се случува – додава Милосављев.