Лидерот на ВМРО-ДПМНЕ Христијан Мицкоски вечерва на митинг во Македонски Брод рече дека власта го задолжила секое семејство за 4500 евра и оти се залудни ветувањата за зголемување на платата кога секојдневно растат трошоците на живот.

– Заев сѐ уште нѐ лаже дека ќе донел 500 евра плата после пет години власт. Може да каже дека ќе биде и 1000 евра платата, но ако 2000 евра се трошоците за живот, тогаш е залудно. Сите цени на производите драстично се зголемуваат, а поскапува и цената на бензинот на светските берзи. Ќе претстои зголемување на цената на бензинот и нафтата, а со тоа и на продуктите во продавниците, истакна Мицковски, додавајќи дека се очекува ново зголемување на цената на струјата.

Обвини дека власта предводена од СДСМ има потрошено 16 милијарди евра народни пари и дека ветувале раст на економијата од пет проценти, а таа е четирипати помала.

– Реалноста во која живееме, тешкиот живот, немањето пристојни услови за живот го даваат одговорот, а тој треба да се заокружи со вашиот глас и изборот на 17 октомври, кога народот ќе биде силата која ќе ги донесе промените, рече Мицкоски.

Осврнувајќи се на евроинтеграциите, Мицкоски рече дека државата на чело со Зоран Заев е сѐ подалеку од Европската унија и дека односите со Бугарија не биле никогаш полоши.

– Иако вчера по пораките кои ги добивме како држава стана јасно дека ЕУ станува далечна цел за државава на чело со Заев, а односите со Бугарија никогаш не биле полоши, сепак тој ги започна своите митинзи со пренесување на поздрави од ЕУ, бидејќи само тоа и им остана, рече Мицкоски.

Обвини дека Заев дека наместо да ги решава проблемите, отворил, како што рече, 1000 нови проблеми.

Извор: МИА