Мбапе му ги скрши срцето на Спајдермен: Никогаш во животот нема да играм за Тотенхем
Фудбалерот на ПСЖ, Килијан Мбапе, ги потврди пишувањата на релевантните европски медиуми дека сезоната ќе ја заврши во францускиот тим и дури на лето ќе размислува за својата иднина.
Медиумите претходно објавија дека Реал Мадрид нема намера да го ангажира Мбапе во зимскиот преоден рок, туку ќе чека да заврши сезоната и потоа да го донесе на „Сантијаго Бернабеу“ како слободен играч, а денеска и самиот фудбалер потврди дека сезоната ќе ја заврши во ПСЖ.
– Дали ќе се преселам во Реал? Тоа нема да се случи во јануари, среќен сум во Париз и ќе дадам се од себе до крајот на сезоната за ПСЖ. Сакам да ги освојам сите трофеи во ПСЖ сезонава. Мислам дека сега не е вистинскиот момент да зборуваме за мојата иднина и единствена работа на која размислувам е да го победам Реал Мадрид во Лигата на шампионите – изјави Мбапе.
Освен што стави крај на шпекулациите за неговиот евентуален трансфер уште во јануари, Мбапе ги разочара и навивачите на Тотенхем, посебно актерот Том Холанд кој е познат по улогата на филмскиот херој Спајдермен.
Претходно, Холанд го повика Мбапе да потпише за Тотенхем, клуб за кој навива, но доби разочарувачки одговор. Тогаш напаѓачот му кажа дека е невозможно да потпише за Тотенхем, а денеска во интервју за Си-Ен-Ен дополнително им стави сол на раните на сите навивачи на англискиот тим.
– Мислам дека никогаш во животот нема да играм за Тотенхем. Том Холанд ме праша за тоа, но одговорот е не… Тотенхем е одличен клуб, сигурен сум дека сезонава ќе направат нешто добро со Конте кој е одличен тренер – изјави Мбапе.