Човекот кој тврдеше дека е син на Ален Делон е пронајден мртов: Во тек е истрага, едно лице е уапсено
Кристијан Арон Булоњ, кој тврдеше дека е син на Ален Делон, беше пронајден мртов пред два дена во неговиот стан во Париз.
Oтворена е истрага и едно лице веќе е приведено поради неукажување помош на лице во опасност, соопштило обвинителството. Весникот „Паризиен“, пак објави дека е приведена партнерката на Булоњ.
Инаку, Булоњ е роден во 1962 година и е син на германскиот модел, пејачка и актерка Нико, икона на бендот „Велвет Андерграунд“.
Арон Булоњ тврдеше дека е син на познатиот актер Ален Делон, кој тоа секогаш го негираше. Меѓутоа, познато е дека Арон го одгледала мајката на Ален Делон, Едит Булоњ, чие презиме го носеше.
Тој пред неколку години поднесе барање за признавање татковство, но француските судови го одбија барањето. Причина за тоа било местото на живеење на Делон, а тоа е Швајцарија.