Мамиќ: Среќа што Динамо Загреб не игра во Премиер лигата
Динамо Загреб одигра брилијантно на стартот од групната фаза од Лигата на шампионите и на „Максимир“ го победи апсолутниот фаворит лондонски Челси со 1:0 со одличниот гол на Мислав Оршиќ.
Динамо на тој начин уште еднаш покажа дека може да се носи со англиските клубови. По поразот на Арсенал со 2:1 во групната фаза од Лигата на шампионите во 2015 година, вториот лондонски гигант падна во најелитното клупско натпреварување.
Загрепчани беа кобни за лондонските клубови и во Лига Европа. Сè уште се прераскажува одличната партија и хет-трикот на Оршиќ против Тотенхем на Мурињо во осминафиналето на Лигата на Европа во 2021 година за пласман во четвртфиналната фаза.
„Модрите“ минатата сезона успеаја да победат во англиската престолнина. Повторно Оршиќ беше главен херој, а негова „жртва“ овојпат беше Вест хем.
Сите овие победи над англиските клубови го „натераа“ првиот човек на хрватскиот шампион, Здравко Мамиќ во свој стил да се огласи на социјалните мрежи и да им порача на Англичаните дека имаат среќа што Динамо не е член на Премиер лигата.
– Динамо 2:1 Арсенал, Динамо 3:0 Тотенхем, Вест хем 0:1 Динамо, Динамо 1:0 Челси…Среќа што Динамо не игра во Премиер лигата – напиша Мамиќ на својот Фејсбук профил.