„Макпетрол“ досега нема добиено официјално барање за промена на начинот на плаќање при набавката на гас, велат од компанијата преку која главно оди снабдувањето со гас во нашата држава.

– Со своето деловно работење „Макпетрол“ има обезбедено доволно средства за набавка на гас што ќе се искористат за купување девизи преку деловните банки и на тој начин ќе се извршат плаќањата согласно барањата на деловните партнери – изјавија од „Макпетрол“ за „Слободен печат“.

Оттаму велат дека сега снабдувањето се одвива без никакви проблеми.

– Како бренд со огромно реноме, „Макпетрол“ со години склучува и реализира годишни договори за снабдување со гас директно со „Гаспром“. Годинава „Макпетрол“ склучи договор со компанијата „Гаспром“ за снабдување со природен гас по цена што е за 30 отсто пониска од берзанската. Снабдувањето од „Гаспром“ се одвива непречено, така што сите деловни партнери кои соработуваат со нашата компанија имаат стабилна и навремена испорака.