Меѓународната агенција за атомска енергија (МААЕ) почна да зема примероци од риба на пазарот во Фукушима, како дел од инспекцијата на локалната средина по почетокот на етапното испуштање во морето на прочистената вода од оштетената јапонска нуклеарна централа Фукушима. Кина, а подоцна и Русија, го запреа увозот на јапонски производи од морска храна поради испуштањето во Тихиот Океан на прочистена радиоактивна вода од комплексот електрани Фукушима во североисточна Јапонија, уништена во цунамито предизвикано од земјотресот во 2011 година.

Испуштањето на пречистената вода од Фукушима започна етапно на 24 август годинава. Ова е прва посета на тим на МААЕ откако Јапонија почна да испушта вода од Фукушима во морето. Јапонија и МААЕ, која го надгледува процесот, претходно соопштија дека операцијата за испуштање вода е безбедна за животната средина и здравјето на луѓето.

Водата – дождовницата, како и онаа од подземни извори или користена за ладење на реакторите на централата е исчистена од повеќето радиоактивни елементи, освен од тритиумот, кој не се смета за опасен освен во високи концентрирани дози.

Поради ова, Јапонија ја разредува таа тритиумова вода со морска вода пред да ја пушти во океанот и испушта многу ограничени количини секој пат, процес кој треба да се протега до 2050-тите.

МААЕ постојано ја следи операцијата, но оваа недела испрати и тим за собирање и анализа на примероци од морска вода во зоната, во соработка со лабораториите на три земји, вклучително и Кина, за да се потврди точноста на јапонските податоци.

„Би очекувале да видиме мало зголемување на нивото на тритиум во морската вода земена многу блиску до местото на испуштање, но ништо од тоа. Треба да најдеме нивоа многу слични на оние што ги измеривме претходно“, им рече на новинарите денеска Пол Мекгинити, научник од тимот на МААЕ.

МААЕ обично поканува повеќе земји во мисијата за контрола на морската средина што редовно ја спроведува во Фукушима од 2014 година, но сега Кина учествува за прв пат.

Оваа година во мисијата учествуваат Кина, Јужна Кореја и Канада, а Мекгинти рече дека изборот на земји не е мотивиран од политички причини.

Тој се надева дека учеството на кинеските научници ќе придонесе за транспарентност за Фукушима, но изрази сомневање дека тоа ќе доведе и до брзо решавање на јапонско-кинескиот трговски спор.