Косовскиот министер за внатрешни работи, Џелал Свечља, на Фејсбук објави дека била извршена акција во Звечан со тврдење дека полицијата спречила терористички напад и дека „Србија се обидува да го дестабилизира Косово“.

„Косовската полиција спречи терористички напад. Благодарение на интензивниот ангажман на специјализираните единици на косовската полиција и добиените информации, денеска на околу 100 метри од општина Звечан е идентификуван автомобил со белградски регистерски таблички во кој имало големи количества оружје, експлозивни направи и муниција “, објави Свечља.

Директорот на српската Канцеларија за Косово Петар Петковиќ, утре претпладне во Владата на Србија ќе одржи вонредна прес-конференција во врска со настаните во Косово.

Високиот претставник на ЕУ за надворешна политика, Жозеп Борел, в понеделник ќе поднесе извештај до министрите за надворешни работи на ЕУ за ситуацијата на северот на Косово и ќе побара поддршка за европскиот план за смирување на тензиите, објавија дипломатски извори во Брисел.

Борел ќе ги информира шефовите на европските дипломатии за резултатите од разговорите со претседателот на Србија Александар Вучиќ и премиерот на Косово, Албин Курти, како и за натамошните чекори за решавање на кризата.

Тој денеска објави на Твитер дека е многу вознемирен од ситуацијата во северниот дел од Косово.

„По вчерашната кризна средба, имаме вонсудски апсења на косовските Срби, марширање на косовските безбедносни сили во јужна Митровица и тешка реторика од Србија. Ескалацијата продолжува и станува опасна. Нема да ја толерираме“, напиша Борел на Твитер.

Курти му одговори на Борел со тврдење дека „ширењето паника и лажни тврдења само ги подгрева тензиите и им помага на оние кои сакаат ескалација“.