Во пресрет на 96. доделување на наградите „Оскар“ во Националната опера и балет на 28 февруари, со почеток во 20 часот, ќе се одржи првата „Оскаровска гала вечер“.

Најубавите филмски песни наградени со „Оскар“ ќе ги изведат врвни поп и оперски пејачи во придружба на оркестарот на Националната опера и балет и Националниот џез-оркестар.

Диригент на концертот е Бисера Чадловска, а настанот е во режија на Дејан Прошев. Концерт мајстор е Верица Ламбевска, светло-мајстор е Милчо Александров.

Низ концертното филмско-музичко патешествие публиката ќе ја води долгогодишниот коментатор на Оскаровскиот пренос, новинарката Миланка Рашиќ.

Дел од учесниците кои ќе настапат на сцената на Националната опера и балет се Весна Ѓиновска-Илкова, Наде Талевска, Андријана Јаневска, Маја Гроздановска Панчева, Ана Петановска, Ана Мицковска, Тамара Раѓеновиќ (Црна Гора / Англија), Игор Дурловски, Горан Наумовски, Даниел Данн, Христијан Тоневски, Денис Димоски.

Ќе настапи и балетска солистичка двојка од Национална опера и балет, Ендру Кук (Англија) и Саша Евтимова, како и танцова двојка од ТСК „Ритам плус“, Андреј Димоски и Ангела Спировска.

Во манир на најблескавата филмска ноќ, настанот ќе започне со Црвен тепих во 19.30 часот, а во текот на концертот публиката ќе ужива во песни кои низ годините станаа големи светски хитови и се дел од историјата на седмата уметност.