Капитените на Барселона одбиваат ново намалување на платите
Каталонскиот гигант ги доживува најтешките моменти во клупската историја, долговите изнесуваат околу 1,3 милијарди евра, претседателот Жоан Лапорта се обидува да ги реши проблемите, но неговите потези наидоа на отпор кај најискусните фудбалери кои одбиваат ново намалување на платите.
Лапорта одби да потпише договор со инвестицискиот фонд „ЦВЦ“ со кој ќе ги решеше сите проблеми, па сега мора да прави радикални чекори за да може да ја испегла финанската година до крајниот рок 30 јуни.
Според каталонските медиуми, Лапорта повторно побарал од фудбалерите да се согласат на ново намалување на платите и почнал од капитените Серхио Бускетс, Жерар Пике и Жорди Алба, и добил ладен туш.
Иако сите тројца фудбалери минатата година се согласија да им се намалат платите за 30 до 50 отсто, сега само Пике бил расположен да разговара за ново намалување, додека Бускетс и Алба го одбиле предлогот.
Бускетс смета дека нема потреба да му биде намалена платата бидејќи идното лето ќе ја напушти Барселона, додека Алба не сака ново намалување на платата откако минатата година се согласи на 40 отсто помали примања.