Како во „Кој тоа таму пее“: Старец од дојранско преорал пат и пресекол пристап, тврди дека земјата е негова
Сцена речиси идентична како во култниот српски и југословенски филм „Кој тоа таму пее?“ се случила вчера во околината на Дојран, кога полицајци забележале пожар, а испаднало дека огнот бил запален од локален жител, пензионер, кој преорал и локален пат, тврдејќи дека земјата е негова.
„На 06.10.2022 во 13.30 часот, полициски службеници од Полициската станица за граничен премин и граничен надзор Стар Дојран, на место викано „Владаја” во Дојран забележале пожар на нискостеблеста шума. Тие излегле на местото и го затекнале П.П.(75) од с.Сретеново, дојранско, кој изјавил дека тој го запалил огнот и го изорал патот под напуштената караула Стар Дојран, сметајќи дека е негов имот, со што го отсекол пристапот до локациите“, се вели во соопштението од МВР.
Екипа на Територијалната противпожарна единица Дојран го изгаснала пожарот, а повредени нема. Увид извршила екипа од ОВР Гевгелија и по целосно расчистување на случајот ќе биде поднесена соодветна пријава.