Иако не успеаја да победат, фудбалерите на Манчестер јунајтед во последното коло од Премиер лигата влегуваат со еден бод предност во битката за Лигата на шампионите. Во последното коло „црвените ѓаволи“ му гостуваат на Лестер и тоа ќе биде пресметка на двата ривали кои се борат за ЛШ.

На тимот на Оле Гунар Солскјер ќе му биде доволен и еден бод на „Кинг Пауер“ стадионот на 26. јули за да игра во ЛШ наредната сезона. Од друга страна, со денешното реми Вест Хем и официјално си го обезбеди опстанокот во Премиер лигата.

Фудбалерите на Јунајтед не брилјираа на својот „Олд трафорд“ и дури му „дозволија“ на противникот да поведе. По неспретната интервенција на Пол Погба во својот шеснаесетник кога играше со рака, беше досуден пенал за Вест Хем. Успешен реализатор беше Мајкл Антонио во судиското продолжение од првото полувреме.

Во вториот дел, играчите на Манчестер јунајтед заиграа далеку подобро, доминираа на теренот, а израмнувачкиот гол го постигна Мејсон Гринвуд кој стана само четвртиот тинејџер во историјата на „црвените ѓаволи“ со 17 постигнати голови во една сезона. Покрај него, во елитното друштво се уште легендите на клубот Џорџ Бест, Брајан Кид и Вејн Руни.