На поширокиот список на македонската кошаркарска репрезентација за претстојните квалификации за ЕП 2025 селекторот Александар Јончевски реши да стави нов Американец, центарот Итан Хап, играч на шпанска Гран Канарија.

На списокот се и најдобриот македонски играч во моментов, плејмејкерот Ненад Димитријевиќ (УНИКС Казан) како и одличниот плејмејкер на Париз, Американецот Ти Џеј Шортс.

Според тоа што ни кажа селекторот изгледа дека ќе се одлучи во тимот на Македонија за февруарскиот циклус да го стави Хап на местото на Шортс, кој имаше клучна улога успешно да ги минеме претквалификациите за ЕП 2025. Двајцата не можат да бидат во тимот.

– Се уште не сум донел конечна одлука, но веројатно дека во тимот ќе биде Итан Хап на местото на Шортс. Оценувам дека моментно сме подефицитарни со високи играчи, па Хап би ни бил попотребен. Очекувам во тимот да го имаме и Димитријевиќ, со кого лично разговарав и од него добив позитивен сигнал што се однесува до учеството во тимот за февруарскиот циклус – вели Јончевски.

Македонија ги почнува квалификациите на 23 февруари со мечот против Естонија во Скопје, а три дена подоцна гостува кај Полска. Општо е мислењето дека мечот со Естонија во Скопје може да биде клучен за пласманот на Македонија на Евробаскетот 2025.

Итан Хап (27, 208) е квалитетен играч на внатешните поизиции, кој би можел да биде повеќе потребен од Шортс за тој клучен меч. Хап во Еврокупот сезонава има просек од 9,6 поени, 6 скока и 2,2 асистенции по меч. Во шпанската АЦБ лига сезонава има просек од 12,3 поени, 5,7 скокови по меч. Шортс исто така е во одлична форма.

Но, на плејмејкерската позиција го имаме Димитријевиќ кој има повеќе од успешна сезона во УНИКС Казан. Затоа Јончевсеки е со размислување, засега, да го вклучи Хап, кому ова ќе му биде деби во нашиот тим, иако поодамна има македонско државјанство.

Јончевски го објави поширокиот список за натпреварите против Естонија и Полска