Јахта потонала откако се судрила со рибарски брод на Јадранот, еден мртов
Едно лице загина, а неколку се полесно повредени во поморска несреќа што се случи во судир на јахта и рибарски брод кај Муртер, во хрватскиот дел на Јадранот.
Несреќата, по која потонала јахтата, се случила синоќа, јавува Хина, која потврдата ја добила од Капетанијата на пристаништата во Шибеник.
„Според сведочењето на учесниците дошло до судир на јахта со хрватско знаме и рибарски брод под хрватско знаме, а во судирот едно лице загинало. Во моментов истрагата и разговорот со сите учесници се уште е во тек, па ќе дознаеме подетално откако ќе заврши истрагата“, изјави капетанот на пристаништето Иван Паушиќ.
Починатиот бил готвач. Неколку лица се полесно повредени и не им била укажана помош во болница, но им била укажана помош на лице место.
Несреќата се случила околу 19 часот и 35 минути, југозападно од островот Мурвењак, во близина на Муртер.