Израелскиот премиер ги уверува семејствата на израелските заложници кои сè уште се држат во Газа дека вложува напори да ги врати назад. Бенјамин Нетанјаху информираше дека разговорите за заложниците со посредство на Катар, сè уште се во тек, пренесува Си-ен-ен. 

„Ве молам да разберете дека ние сме навистина посветени во целосна смисла на зборот. Тоа е вистински напор, рече Бенјамин Нетанјаху на состанокот со претставници од 18 семејства во неговата канцеларија во Ерусалим во средата.

Во однос на договорот за ослободување на заложниците, Нетанјаху рече дека може да сподели само ограничени информации и дека е прерано да каже како ќе се случи ослободувањето на заложниците. Сепак, портпаролот на Советот за национална безбедност на САД, Џон Кирби, рече дека „разговорите околу оваа тема биле конструктивни“.

Нетанјаху рече дека нема да се согласи со барањата на Хамас да ослободи илјадници палестински затвореници и да се повлече од Газа за да обезбеди ослободување на заложниците. И неговите екстремно десничарски коалициски партнери, министерот за национална безбедност Итамар Бен Гвир и министерот за финансии Безалел Смотрич остро го критикуваа потенцијалниот договор.