Израелската армија (ИДФ) денес, на денот кога стапи во сила прекинот на огнот со Хамас, објави дека милитантната група „е поразена секаде каде што се бореле против неа и дека групата веќе не е тоа што беше“.

„Хамас повеќе не е Хамас од пред две години. Хамас е поразен секаде каде што се боревме против него“, изјави бригадниот генерал на ИДФ, Ефи Дефрин, на прес-конференција, објави Ројтерс.

Тој ги повика жителите на Газа да избегнуваат влегување во областите контролирани од израелските сили во енклавата.

„Придржувајте се до договорот и осигурајте ја вашата безбедност“, рече Дефрин.

Прекинот на огнот, кој стапи во сила денес со посредство на Соединетите Американски Држави, им овозможи на илјадници раселени Палестинци да почнат да се враќаат во своите домови, додека израелските трупи почнаа да се повлекуваат од делови од Газа.

Договорот, исто така, вклучува размена на заложници и хуманитарна помош за цивилното население.