Денеска македонската атлетика слави уште еден медал од Балканското првенство за сениори во сала во Истанбул, Дарио Ивановски успеа да се закити со сребрен медал.

Претходно за нашата земја првиот медал во турскиот град го донесе Андреас Трајковски во дисциплината скок во далечина.

Ивановски на трката на 3000 метри со резултат 07:58.48 минути и нов национален рекорд на Македонија вреден 1087 бода, го освои второто место и сребрениот медал.

Златото му припадна на Словенецот Вид Ботолин (07:57.98 мин.), а третопласиран е Мурат Емектар од Турција (08:00.18 мин.)

Во истата дисциплина претходната година на истото првенство Ивановски го освои златниот медал и се закити тогаш со титулата балкански шампион.