Инвазивната и штетна риба сончарка за првпат уловена во Дебарското Езеро
Од водите на Дебарското Езеро денеска за првпат е извлечена риба од видот сончарка, информираат од Спортското риболовно друштво „Трофта” („Пастрмка“).
Рибата е уловена од делот на езерото кај општината Центар Жупа, а риболовецот е извесен Агим од Тетово, кој често рибари на ова езеро, велат од Друштвото.
Сончарката е инвазивен вид од Северна Америка, кој, откако е доведен во Европа на почетокот на 20-от век, е проширен во слатките води насекаде низ Стариот континент. Нејзиното латинско име е Lepomis gibbosus. Малата слатководна риба се среќава во многу наши води, најчесто во акумулациите, но и во Преспанското и Охридското Езеро, како и во реката Црн Дрим, од каде веројатно пристигнала во Дебарското Езеро. Друга претпоставка е дека сончарката, која поради живите бои е популарна риба за чување во аквариуми, била пуштена во езерото од неодговорен сопственик.
Таа е позната и под локалните имиња: јапонски караш, жолтица, јапек, јапич, јапонец, свиланец… Достигнува максимална должина од 15 сантиметри и најголема тежина до 400 грама. Со оглед на тоа што нема природни непријатели, а е агресивна и се храни со икра, други риби и секакви водни животни, сончарката се смета за штетник во реките и езерата во Европа.
Кон средината на април годинава, рибарот Африм Даци од Дебар за првпат улови сом тежок 25 килограми во езерото, кај селото Џепиште. Даци, кој е долгогодишен страстен риболовец, тогаш изјави дека ловел пастрмки, крапови, мрени, скобал, но дека пред него никој не уловил сом.
Од СРД „Трофта” велат дека и тогашниот и денешниот случај се единствени досега од изградбата на акумулацијата пред повеќе од пет децении.