Интер ќе донира 100.000 евра во истражувањето за коронавирусот
Италијанскиот тим Интер и неговиот претседател Стивен Жанг ќе донираат 100.000 евра на Одделот за биомедицински истражувања во болницата Сако во Милано како помош во борбата со епидемијата на коронавирусот.
– Интер има нераскинливи врски со Милано и е горд на посветеноста на персоналот во болницата Сако во овие тешки моменти. Од почетокот на појавата на коронавирусот , ние како клуб со големо внимание ја следиме ситуацијата бидејќи за нас најважно е јавното здравје. Поради тоа Интер чувствува обврска да помогне на болницата Сако со донација – изјави преседателот на Интер, Стивен Жанг.
Досега во Италија од коронавирусот се заразени повеќе од 3.000 лица, а 107 лица се починати. Бројката на новозаболени од коронавирусот во последните 24 часа е зголемен за дури 28 проценти.
Поради ширењето на епидемијата, италијанската Влада одлучи сите спортски натпревари до 3 април да се играат без присуство на гледачи.
Ова значи дека натпреварите од Лигата на шампионите и Лигата на Европа, италијанските екипи ќе ги играат на празни стадиони, додека некои од најголемите дерби натпревари во Серија А како Јувентус – Интер и Јувентус – Милан се одложени.