Интер ја одби првата понуда на Манчестер јунајтед за голманот Онана
Првите луѓе на Манчестер јунајтед и Интер во наредните денови ќе ги продолжат преговорите околу трансферот на голманот на миланскиот клуб Андре Онана во тимот од „Олд Трафорд“, пренесува „Скај Спортс“.
Интер ја одби првата понуда од Јунајтед која изнесуваше околу 45 милиони евра. Италијанците бараат 60 милиони евра за камерунскиот голман, кој треба да го замени Шпанецот Давид де Хеа.
Извори блиски до преговорите тврдат дека трансферот треба да биде комплетиран најдоцна до 13 јули, бидејќи тогаш Интер ги започнува подготовките за новата сезона. Британските медиуми пренесуваат дека Интер би можел да се согласи на надомест од 52,5 милиони евра за Онана.
Камерунецот им порача на „нераѕурите“ дека сака да ја продолжи кариерата во Манчестер јунајтед каде повторно би соработувал со Ерик тен Хаг.
Онана (27) минатата година пристигна во Интер од Ајакс. Минатата година запиша 41 настап за Интер во сите натпреварувања.