Интегра: Да не дозволиме некој да си поигрува со македонската национална стратегиска ориентација
Лидерот на политичката партија Интегра, Љупчо Ристовски вечерва пред гостиварци во рамки на предизборната кампања порача дека на претстојните избори ќе треба да се симнат од тронот на власта оние кои, како што рече, од 30 години владеење не и донеле добро на државата.
Во летниот амфитеатар пред поддржувачите на партијата, Ристовски зборуваше за важноста од постоење на држава на Македонците и остварување на стратегиска ориентација.
– Ние го имаме тоа право и според божјата правда и според меѓународното право. Тоа право ни доаѓа од искуството во минатото кога плејада борци ги дале животите. Не смееме да дозволиме да бидеме дел од најслабата генерација Македонци која ја губи татковината и испушта од рака. Не смееме да дозволиме некој да си поигрува со македонската национална стратегиска ориентација, рече Ристовски.
Тој ги критикуваше партиите кои изминативе години не ѝ донеле добро ниту на народот ниту на граѓаните и од нив побара добро да размислат за иднината и да ги поддржат на претстојните избори.
Виолета Србиноска, носител на листата за кандидати за пратеници за Шестата изборна единица појасни делови од програмата кои, како што рече, се конкретни предлози и решенија за да се врати достоинството на Македонецот и конечно секој граѓанин да биде задоволен и горд на својата етничка припадност. Таа од гостиварци побара да излезат на гласање во што можно поголем број.