Индиската влада ги означи истополовите бракови како „елитистички“
Индиската влада го изрази своето жестоко противење на легализацијата на истополовите бракови, нарекувајќи го „урбан елитистички концепт“ што ги поткопува религиозните и општествените вредности, откако врховниот суд започнува сослушувања за правата на ЛГБТИ+ луѓето да бидат во брак според законот, пренесува „Гардијан“.
Десетици петиции од ЛГБТИ+ активисти беа поднесени пред највисокиот суд во земјата како дел од колективната тужба која се бори за правото на ЛГБТИ+ луѓето да бидат во брак и да имаат еднаквост според законот.
Тоа е најзначајниот предизвик за статус-квото на правата на хомосексуалците од 2018 година, кога, со значајна пресуда, врховниот суд го укина законот од колонијалната ера што ја криминализира хомосексуалноста.
Сослушувањата за истополовите бракови доаѓаат во време на постепена општествена промена во Индија, каде што ЛГБТИ+ луѓето стануваат се повидливи, особено во популарната култура и во маршевите на гордоста што се одржуваат во поголемите градови, додека постои растечка свест за правото на еднаквост. Сепак, повеќето прифаќаат дека има уште долг пат да се помине во смисла на целосно општествено прифаќање и безбедност од стигма и вознемирување, бидејќи земјата останува длабоко традиционална и патријархална.