Патнички авион на руската национална авиокомпанија Аерофлот денеска морал да ја промени висината за да не се судри о авион на НАТО.

Руски претставници изјавија дека инцидентот се случил над Црно Море, кога авионот на Аерофлот летал од Тел Авив кон Москва. Авионот, во кој имало 142-ца патници, морал да се спушти на 1.800 метри за да избегне судар. Тие тврдат дека екипажот на авионот ЦЛ-600 на НАТО не реагирал на предупредувањата.

Северноатлантската алијанса сѐ уште не го коментираше инцидентот, јавува Ројтерс.

Тензиите меѓу Русија и НАТО деновиве се зголемуваат, а Украина ја обвини Русија дека натрупува воени сили на границата и планира инвазија, додека Москва тврди дека Киев се однесува воинствено.

Иако Украина не е сојузник на НАТО, силите на Алијансата често дејствуваат во нејзина полза, за да ја заштитат од она што го нарекуваат „руско провокативно однесување“.