Гоце Георгиевски: Подмладената репрезентација е со голем потенцијал
Десното крило е еден од највозрасните во подмладениот тим. Споредувајќи го сегашниот А-тим на Македонија со поранешните состави, Георгиевски, по успешниот старт на Квалификациите за ЕП 2024, е задоволен и оптимист за иднината
Десното крило Гоце Георгиевски (35) е долго време член на македонската репрезентација, а сега ја доби довербата од селекторот Кирил Лазаров и во овој подмладен состав заедно со голманот Никола Митревски (37) е највозрасниот член. Георгиевски со своето искуство може да направи споредби на овој подмладен тим кој моментно успешно настапува во квалификациите за ЕП 2024, со поранешните состави на репрезентацијата и токму затоа неговото мислење е интересно.
– Ова е многу подмладена репрезентација. Од последниот собир во мај ги нема Кирил Лазаров, Филип Миркуловски и Стојанче Стоилов. Јас и Митревски сме најстари во репрезентацијата. Веднаш да кажам, оваа репрезентација има голем потенцијал. Многу важно е што селектор е Кире Лазаров, кој е вистински човек за вистинска работа. Добро се работи на тренинзите, има желба меѓу младите за докажување, а селекторот тоа правилно го насочува – вели Георгиевски.
Тој смета дека времето ќе каже кој е дометот на овој тим.
– Потенцијал има, тоа е факт. Но ќе треба да помине време да ги очекуваме вистинските резултати од оваа генерација. Квалитетно се работи, селекторот е 24/7 посветен на националниот тим. Дефинитивно ова е вистинскиот начин некоја репрезентција да направи успех. Оптимист сум, позитивно гледам на оваа работа. Македонија и во иднина ќе го сочува оној континуитет на настапи на европски и на светски првенства. Ќе бележиме добри резултати – вели Георгиевски.
Македонија првите два натпревара од квалификациите за ЕП со Луксембург и со Турција ги доби со висока разлика (38-24, односно 36-27). Но се работеше за објективно послаби противници.
– Овие два натпревара бевме фаворити и ја оправдавме таа улога. Но, на двата натпревари влеговме максимално сериозно, како да играме со некои европски велесили. Потребен е таков пристап на секој натпревар без разлика дали е Турција, Норвешка, Франција или Луксембург. Тоа е единствен начин да победиш на еден меч – вели Гоце.
Според него и хемијата во тимот придонесува тој да изгледа компактно.
– Има неверојатна дружба меѓу репрезентативците. Младите не почитуваат нас повозрасните, а ние им подаваме поддршка на младите. Има вистинска кохезија помеѓу нас поискусните и младите – смета Гоце.
Она што ја очекува репрезентацијата е двомечот со Португалија во квалификациската група во март. Иако уште е рано, најверојатно од овој двомеч ќе зависи дали Македонија ќе биде прва или втора во квалификациската група. Обете места водат сигурно на ЕП, но, сепак првото место е поповолно.
– Битно ни е да го освоиме првото место во групата затоа што така би биле во поповолен „шешир“ за ждрепката за ЕП. Покрај тоа, секоја победа е важна – смета десното крило.
Тој е задоволен од својот придонес во овој подновен тим.
– Задовоен сум како настапувам за репрезентацијата, добро сум физички подготвен, се чувствувам добро. Секогаш стојам на располагање на мојот национален тим – вели Георгиевски, кој за А тимот на Македонија настапува од 2009 година.