Германска европратеничка ќе се бори против десничарскиот популизам на европските избори
Потпретседателката на Европскиот парламент Катарина Барли ќе ја предводи Германската Социјалдемократска партија (СПД) на европските избори, откако денеска доби поддршка на партиското собрание во Берлин. Барли повика на одлучна кампања против десничарскиот популизам и автократите на изборите на 9 јуни.
„Ова е одлука за идната насока“, рече Барли во присуство на канцеларот Олаф Шолц.
Конзервативците и економските либерали сакаат да ја сведат Европската унија на обичен внатрешен пазар, додека други сакаат да го напуштат блокот, рече Барли, мислејќи на екстремно десничарската партија Алтернатива за Германија (АфД), која е високо рангирана во предизборните анкети.
„Тие за најкратко време би создале сериозна опасност за германската економија“, вели Барли, која освен германско има и британско државјанство, а беше министерка за правда во владата на Ангела Меркел.
Барли ги критикуваше целите на АфД како „агенда против работничката средна класа“. Опишувајќи ја партијата како „новите нацисти“, таа рече дека тие сакаат да ја поткопаат демократијата и да депортираат луѓе од странско потекло, без разлика дали имаат германско државјанство.
Барли ја обвини Европската комисија дека не постапува против постапките на унгарскиот премиер Виктор Орбан кои ги блокираа одлуките одобрени од другите членки на Европската унија.
„Тој ја уценува ЕУ со своите блокади“, рече таа, посочувајќи ја европската поддршка за Украина, плановите за проширување и европскиот буџет, кој Унгарија го блокираше. Иако Комисијата можеше да ги ускрати средствата на Унгарија, таа не го стори тоа доволно доследно, рече таа.
„Време е да испратиме јасна порака до Виктор Орбан“, рече Барли и повика на укинување на принципот на едногласно одлучување во ЕУ.
Дваесет и седум земји-членки на ЕУ во јуни ќе одржат избори за да го одредат новиот состав на Европскиот парламент и политиките и приоритетите на блокот.