Германец (31), кој неделава бил фатен како со рачен часовник снима голи деца на плажа во Истра во Хрватска, бил предаден на единицата за притвор на Полициската управа со кривична пријава, јавува „Н1“.

Полицијата утврдила сомнение дека Германецот сторил кривично дело експлоатација на деца за порнографија.

Во вторникот вечерта, посетители на плажата го забележале Германецот како снима голи деца со рачен часовник со интегрирана камера и веднаш го пријавиле сомнителното однесување во полиција.

Полицијата ги претресла просториите, возилото и техничката опрема што ја користел Германецот, како и содржината што ја снимил, каде што пронашла инкриминирачки материјали.

„Криминалистичките истражувања како ова покажуваат дека јавноста е сè повеќе свесна за проблемот со снимањето деца и дека граѓаните препознаваат сомнително однесување, што ѝ овозможува на полицијата навремено да реагира и да ги уапси сторителите“, соопшти полицијата.

Полицијата ги повикува родителите да ги чуваат своите деца и да следат каде се и што прават на плажата.