Јапонскиот синџир кафулиња „Мипиг“ им нуди на гостите можност да уживаат во шолја чај во друштво на преслатки минијатурни прасиња. Во секое од четирите кафулиња на „Мипиг“, кои имаат одлични оценки на „Трипадвајсер“, минијатурните прасиња слободно трчаат наоколу и сакаат да се галат со гостите.

Пејџ Филипс (25) од Единбург, Шкотска го посетила едно од кафулињата и за „Дејли мејл“ го опишала своето искуство.

– Сакав да го посетам кафулето затоа што ми се допадна идејата да се дружам со минијатурните прасиња. Кога стигнавме, ни дадоа кратко објаснување како да се справиме со нив. На пример, треба да чекате да ви се приближат и не треба да ги земате во раце бидејќи не го сакаат тоа. Потоа ни го покажаа патот до масата во голема соба полна со минијатурни прасиња. Прасињата беа возбудени и преслатки, веднаш дојдоа до нас во потрага по храна – рече таа.

Од кафулето им препорачуваат на гостите да ги истегнат нозете за свињите полесно да им се качат во скутот, а персоналот нагласува дека прасињата нормално одмараат во посебна просторија доколку се чувствуваат уморни и дека ветеринарот редовно го проверува нивното здравје. Животните понекогаш знаат да ги гризат прстите на луѓето затоа што ги мешаат со храна.

Кафулињата се наоѓаат во областите Шибуја и Мегуро во Токио и во градовите Кошигаја и Осака. Гостите плаќаат околу 9 евра за половина час сесија, со пијалоци од околу 5 евра и грицки што можете да им ги дадете на прасињата за околу 2 евра.

Дозволено е фотографирање, сè додека блицот е исклучен.