ФОТО | Руски и американски војници случајно се сретнаа во Сирија, решија да се фотографираат и помуабетат
Патроли на војници од рускиот конвој и нивните американски колеги се сретнаа на нафтено поле во близина на сирискиот град Ал Кахтанија, североисточно од провинцијата Хасака, во близина на границата со Турција.
Фотографиите објавени од АФП покажуваат дека војниците се поздравуваат, се ракуваат и заедно се фотографираат за време на средбата во близина на турската граница.
„Бизнис инсајдер“ потсетува дека на слична средба во 2020 година, руски војници ги принудија американските војници да излезат од патот. Имено, пред две години, кога две патроли се сретнаа на североистокот на Сирија, дојде до судир на оклопни возила, при што беа повредени четворица американски војници, а администрацијата на тогашниот претседател Доналд Трамп ги осуди Русите за „непрофесионални“ постапки.
Минатата недела, двете армии повторно се сретнаа на околу еден час возење од местото на инцидентот во 2020 година. Но, сега, наместо непријателска интеракција меѓу двете нуклеарни сили, имаше насмевки, ракувања и групни фотографии. Некои од фотографиите, направени од дописникот на АФП, Делил Сулејман, покажуваат руски возила со ознаките „З“ кои се гледаат на нивните оклопни таблички при инвазијата на Украина.
Се чини дека САД и Русија ги оставија настрана нивните разлики во Сирија, каде што Кремљ го поддржува сирискиот претседател Башар ал-Асад, а Вашингтон ја поддржува курдската милиција која се бореше против Исламската држава и создаде де факто автономен регион во близина на турската граница.