ФОТО | Разговор со Ламбе и Полина: Добра комбинација сме, спонтано се случи дуетот
Заврши 38. издание на фестивалот на забавна музика „Макфест 2023“ во Штип, а еден од повпечатливите настапи имаа Полина Тасева и Ламбе Алабаковски, кои настапија во дует со песната „Врати се“.
Пред самиот настап во саботата, на ревијалната вечер на „Макфест“, успеавме Полина и Ламбе накратко да ги „уловиме“ за да ни кажат нешто повеќе околу нивната соработка и настапот на фестивалот.
Прво што сите ги интересира е како дојде до дует и заеднички настап на „Макфест“?
Ламбе: Многу спонатано. Песната е на Ирена Стојановска, текстот исто така, аранжманот е на Димитар Андоновски, добра комбинација испадна за нас за да уживаме во дуетот, така што спонтано се случи.
Полина: Првпат настапуваме заедно. Од скоро се знаеме, иако јас го знам Ламбе од претходно, затоа што сум го слушала, така што ми е драго што соработуваме заедно.
Како вие двајца стапивте во контакт?
Полина: Авторот нè спои. Од нивна страна имале идеја нас двајцата да нè поврзат во една песна.
Ламбе: Еден убав тим, навистина имаме понекогаш и дружби и се гледаме, особено со Димитар Андоновски. Целиот настап гледавме да биде со позитивна енергија, да се запамти и сценскиот настап, нормално да остане и песната како песна да се слуша, тоа е најголемиот успех за една песна. На сцената сме во придружба со уште четири девојки од „Брејк а лег“.
Дали ви пречи што вечерва е ревијална на „Макфест“?
– Не. Воопшто не.
Зарем не е поголем предизвик да се натпреваруваш?
Ламбе: Живееме во еден голем дисбаланс на општеството, така што можеби и подобро да нема во овој период награди, како што имаше во 2013 година големи суми за награди. Најголем успех е да остане песната да се слуша.
Полина: Пред сè, убаво е што се дружиме. Само на овој начин можеме сите заедно – музичари, артисти што не сме се познавале, да се запознаеме и да си ги слушнеме песните.
Кој се погрижи за вашиот вечерашен стајлинг?
Ламбе: За стајлингот и на двајцата се погрижи модниот дизајнер Андреј Папаз.
ФОТО | Лара и Пајак добија 120.000 денари од „Макфест“ за најслушана песна меѓу два фестивали
ФОТО | Модата на „Макфест“: Секси чизми со светки, крилја од пердуви, свила и бисери
