ФОТО | Публиката на најголемиот светски хеви метал фестивал во кал до колена
Поројниот дожд во Германија го претвори теренот на најголемиот светски хеви метал фестивал во кал, принудувајќи ги организаторите да вратат многу потенцијални посетители и сопственици на билети.
Фестивалот „Вокен опен ер“ (Wacken Open Air) во Шлезвиг-Холштајн, северна Германија, беше отворен во средата и истата вечер организаторите соопштија дека на оние кои сѐ уште не пристигнале ќе им биде одбиен пристапот до локацијата поради, како што ги нарекоа, непоправливите услови, пренесе „Гардијан“(Theguardian).
„Понекогаш врне дожд на фестивали, но ретко толку многу како што видовме сега“, се вели во соопштението.
На четиридневниот фестивал учествуваат околу 200 бендови од целиот свет, од Украина до Јапонија. Хедлајнерите Ајрон Мејден треба да настапат во петок навечер, заедно со Мегадет.
По апелот до сопствениците на билети кои сè уште не пристигнале, да не доаѓаат откако кампот беше поплавен, организаторите рекоа дека е достигнато „разумно ниво на посетители“ и оние кои донеле одлука да си заминат или пак нема воопшто да пристигнат, средствата ќе им бидат рефундирани.
Организаторите потврдија дека ова е прв пат да донесат ваква одлука во 33-годишната историја на фестивалот.
„Многу сме тажни, но континуираната тешка временска ситуација, за жал, не ни остава друг избор“.
Овогодинешниот фестивал, кој привлекува обожаватели од целиот свет, се одржува под мотото: „Погласно од пеколот“.