Првиот понеделник во мај е резервиран за најелитниот моден настан на годината – Мет гала. Во понеделникот целиот моден свет се собра во Метрополитен музејот во Њујорк, каде што беа претставени најекстравагантните модни комбинации.

Годинашната тема на настанот беше „Карл Лагерфелд: линија на убавина“, во чест на покојната модна икона Карл Лагерфелд. Овој германски моден творец, уметник и фотограф соработуваше на многу проекти поврзани со уметноста и модата, најмногу како главен творец и креативен директор на модната куќа „Шанел“. Дизајнерот, кој почина во 2019 година на 85-годишна возраст, беше препознатлив по своите темни очила за сонце и белата коса врзена во реп. Исто така, тој често се појавуваше во јавноста со неговата сакана мачка – Шупет.

Инспирирани од неговата впечатлива појава и дизајнерска работа, стотици познати личности пристигнаа на Мет гала облечени во креации во чест на Лагерфелд, вклучувајќи ги неговите препознатливи бисери, панделки, твидови, елегантни вратоврски и блејзери.

Тениската ѕвезда Роџер Федерер, пејачката Дуа Липа, актерката Пенелопе Круз и писателката Михаела Коел беа поканети да бидат годинашните копретседавачи на настанот, заедно со главната уредничка на „Вог“, Ана Винтур.

Мачката Шупет беше поканета на настанот, но не присуствуваше на годинашната Мет гала. Сепак, актерот Џаред Лето и музичката ѕвезда Доџа кет пристигнаа облечени како мачка и на тој начин ѝ оддадоа почит на саканата миленичка на Лагерфелд.

Меѓу елегантните креации се истакнаа онаа на актерката Никол Кидман, која се појави во розов фустан на „Шанел“, кој Лагерфелд ѝ го дизајнираше во 2004 година. Марго Роби, Пенелопе Круз, Џенифер Лопез и други, го изнесоа вистинскиот стил на „Шанел“.

Освен елегантните тоалети што се дел од модното творештво на Лагерфелд, некои ѕвезди додадоа нота на екстраваганција во своето изразување врзано со тематиката на Мет гала.

Меѓу нив, секако е раперот Лил Нас Икс, кој пристигна како митско суштество, облечен во бисери и обоен во сребрена боја.

Ким Кардашијан, која минатата година се појави во легендарниот фустан на Мерилин Монро, годинава облече трико и се „покри“ од глава до петици со бисери. Кендал Џенер, во својствен стил, го покажа задникот во црното блескаво трико.

Манекенката Карли Клос и тенисерката Серена Вилијамс ја искористија ноќта како можност да ја објават својата бременост. И двете изгледаа прекрасно во придружба на своите партнери.

Сепак, највпечатлив момент на вечерта беше пристигнувањето на Ријана и Ејсап Роки. Пејачката облече целосно бела креација на „Валентино“, а нејзиниот партнер се одлучи за црн блејзер, килт и фармерки од „Гучи“. Како што пишува „Вог“, тие се „кралската двојка на Мет гала“.