Нашите најдобри фудбалери по триумфот над Италија, сега веќе се фокусираат кон натпреварот со Португалија, финалето за пласман на Светското првенство во Катар.

Македонската А репрезентација никогаш не била толку блиску до учество на Мундијал, избраниците на селекторот Благоја Милевски имаат историска шанса.

Италијанците ја имаа фаворитската улога, но истата не ја оправдаа, во финишот стигна казната со голот на Александар Трајковски во 92 минута на стадионот во Палермо.

Нашите дефанзивци имаа многу работа во текот на мечот, на крајот половина од ударите на противникот беа блокирани, што значи дека одлично се браневме.

Еден од нив беше Висар Муслиу со оценка 8,04 кој во изборот на порталот „WhoScored“ се најде во тимот на колото по завршувањето на полуфиналните дуели во баражот за СП. Тука е и голманот Столе Димитриевски кој придонесе со своите одбрани и доби оценка 7,52.

Во одбраната покрај Муслиу, се наоѓаат уште Швеѓанецот Даниелсон, и Велшаните Родон и Вилијамс. Потоа, во средниот ред Отавио (Португалија), Соучек (Чешка) и Верати (Италија), а во нападот Бејл (Велс), Сабицер (Австрија) и Исак (Шведска).