ФОТО | Археолозите откриваат: Пронајден најстариот артефакт во форма на пенис
Луѓето можеби се кителе со приврзоци во форма на пенис, илјадници години пред Римјаните и Грците. Пронајдениот артефакт, изработен пред околу 42.000 години, е изрезбан во форма што изгледа како пенис, пишува „Лајв саенс“ (Live science).
Во новата студија, археологот Соланж Риго од Универзитетот во Бордо и нејзините колеги, велат дека сѐ е во деталите. За нив, каменото парче од 4,3 сантиметри е „најраната позната полова антропоморфна претстава“.
Инаку, приврзокот бил откопан во 2016 година на локацијата наречена Толбор, во Монголија. Датирањето на органскиот материјал со јаглен, покажало дека артефактот е стар помеѓу 42.400 и 41.900 години.
На самиот приврзок има два жлебови, направени од шилеста камена алатка. Најдлабокиот жлеб е изрезбан околу средината на приврзокот, додека другиот жлеб се протега кратко и длабоко од врвот на приврзокот, па надолу.
Најсилниот аргумент на археологот Соланж, дека овој приврзок е со форма на пенис, се карактеристиките на кои се фокусирале при неговата изработка. Археолозите велат дека првиот засек бил дизајниран да ја прикаже формата на пенисот, додека вториот засек бил издлабен да изгледа како отвор на уретра.
Овој артефакт не е јасно препознатлив, но доколку поставените тези на археолозите се точни и се потврдат, ова би можело да биде најраниот пронајден симбол за машки гениталии.